Indici ta' din il-pagna:

1. -

---

F'Din is-sezzjoni:

1. Jiġi fi tmiemu l-Pjan Pastorali 2005-2006
2. Ippubblikat id-dokument dwar il-Knisja u l-persuni b'diżabilità – Lejn Knisja dejjem aktar inklużiva
3. Il-Knisja f'Malta tfakkar il-25 sena mill-Familiaris Consortio
4. Jiltaqgħu l-Assemblej Parrokkjali
5. ĦARSA 'L QUDDIEM – PJAN PASTORALI ĠDID
6. TILTAQA' L-ASSEMBLEA DJOĊESANA
7. MESSAĠĠ FAVUR IL-MARA
8. IL-ĦIDMA TAL-KNISJA FL-EDUKAZZJONI AMBJENTALI
9. L-ISFIDA TAL-PLURALIŻMU RELIĠJUŻ F'PAJJIŻNA
10. IL-FAMILJA FIĊ-ĊENTRU TAL-ĦIDMA PASTORALI
11. GĦAJNUNA GĦAT-TALB FIL-FAMILJA
12. KNISJA B'ĦAFNA KARIŻMI
13. SEJĦA GĦALL-FORMAZZJONI FIL-FIDI
14. IL-KNISJA TWASSAL IT-TAGĦLIM SOĊJALI
15. IPPUBBLIKAT IĊ-CHARTER TA' L-ISTITUT TA' FORMAZZJONI PASTORALI
16. IL-PARROĊĊA LLUM U GĦADA
17. GRUPPI GĦAT-TWETTIQ TAS-SINODU FIL-PARROĊĊI F'MALTA
18. PROĠETTI TA' FORMAZZJONI
19. IL-PROĠETT TA' UNITAJIET PASTORALI
20. KUNSILL GĦAS-SERVIZZ TAL-PARROĊĊA
21. IL-KNISJA F'ĦIDMA FAVUR DAWK FIL-BŻONN
22. DĦALNA FIT-TIENI SENA TAL-PJAN PASTORALI

Artikli ippubblikati fil-Ġensillum

Jiġi fi tmiemu l-Pjan Pastorali 2005-2006

Ħarsa lejn il-ħidma għat-twettiq tas-Sinodu matul 2006

L-aħħar tas-sena 2006 iġib fi tmiemu l-Pjan ta' ħidma li l-Knisja f'Malta kellha għas-sentejn 2005-2006, bl-isem Nimxu Flimkien fid-Dawl tal-Mulej. Dan il-Pjan kellu l-ħsieb li jkompli t-twettiq ta' dak li ħareġ mis-Sinodu Djoċesan.

Ħarsa ħafifa lejn il-ħidma li twettqet matul din is-sena turina li sar ħafna għall-ġid ta' setturi differenti tas-soċjetà Maltija.

L-Istitut ta' Formazzjoni Pastorali, li twaqqaf b'rizultat tas-Sinodu, ħadem b'enerġija u f'ħidma flimkien ma' oħrajn, f'diversi proġetti ta' formazzjoni. S'issa diġa' saru jew bdew isiru proġetti ta' formazzjoni fl-oqsma taż-żgħażagħ, ħidma soċjali u karità, ħaddiema, parroċċi, kleru, Christian Leadership. Matul 2006, l-Istitut ħadem flimkien ma' oħrajn biex ġew ippubblikati sussidji formattivi, bħall-ktieb Uncoding Jesus Christ li kellu suċċess kbir speċjalment maż-żgħażagħ.

Saret b'impenn ħidma pastorali mal-familja, permezz tal-Kummissjoni Djoċesana Familja u tal-Moviment ta' Kana – per eżempju, il-ħidma ta' sapport lill-parroċċi, il-formazzjoni tal-counsellors, it-tiġdid f'diversi servizzi bħat-tħejjija ta' dawk li resqin għaż-żwieġ, it-twaqqif ta' gruppi ta' sapport għal persuni separati.

Kompla t-tiġdid fil-ħidma pastorali fil-qasam taż-żgħażagħ. Il-Kummissjoni Djoċesana Żgħażagħ ħadmet biex tkun strutturata b'mod aħjar għas-servizz ta' gruppi ta' żgħażagħ, skond kif mitlub fis-Sinodu.

Baqa' jissaħħaħ l-impenn tal-Knisja fuq issues soċjali. Il-Kummissjoni Ambjent, li twaqqfet b'rizultat tas-Sinodu, ħadmet bis-sħiħ għall-edukazzjoni ambjentali ta' l-insara Maltin, u biex tagħti kontribut lis-soċjetà Maltija permezz ta' opinjonijiet studjati fuq issues ambjentali. Matul 2006 ġiet ri-strutturata l-Kummissjoni Ġustizzja u Paċi, li qed tagħmel studju ta' diversi issues li jmissu l-ħajja soċjali u se tagħti wkoll kontribut permezz tar-riflessjonijiet tagħha.

Kompliet il-ħidma tal-Knisja favur il-ħajja umana u b'riżq id-dinjità tal-bniedem, kif ukoll l-impenn tagħha ta' qadi u solidarjetà. Dan deher fil-firxa wiesgħa ta' servizzi tal-Knisja għal dawk li kienu f'sitwazzjoni ta' tbatija.

Ġie ppubblikat id-dokument mitlub mis-Sinodu dwar is-sehem tal-persuni b'diżabilità fil-ħajja u fil-missjoni tal-Knisja, bl-isem Lejn Knisja dejjem aktar inklużiva. Dan id-dokument joffri viżjoni ċara u proposti prattiċi kemm għall-ħidma fl-Arċidjoċesi kif ukoll fil-parroċċi.

Saret riċerka ta' għajnuna għall-ħidma pastorali. Riċerka importanti li saret mid-Discern kienet dwar iċ-ċensiment ta' l-attendenza tal-quddiesa tal-Ħadd. Ir-rapport preliminari ġie ppubblikat f'Awissu. Dan ħoloq ukoll diskussjoni u riflessjoni importanti, li fl-aħħar mill-aħħar se sservi għal ħidma pastorali aħjar, speċjalment fejn tidħol il-ħidma ma' persuni li ma jħossux il-bżonn tal-quddiesa.

B'rabta mal-quddiesa, ta' min isemmi diversi inizjattivi li saru f'parroċċi u fi knejjes f'Malta għal ċelebrazzjoni aktar ħajja tal-quddiesa tal-Ħadd, b'attenzjoni partikulari għall-familja, għaż-żgħazagħ u għat-tfal.

Matul l-2006, issaħħaħ ukoll il-koordinament bejn il-parroċċi permezz ta' l-unitajiet pastorali, li issa stabbilew ruħhom bħala mezz f'waqtu għal ħidma tal-komunitajiet flimkien, kif mitlub mis-Sinodu.

Dawn huma uħud mill-oqsma ta' ħidma pastorali li saret bi twettiq ta' dak li l-Pjan Pastorali 2005-2006 kien jindika għall-Knisja f'Malta. Hemm ħafna ħidma oħra, u hemm ukoll ħafna ħidma li ma tidhirx, imma li għenet biex ħafna nsara jkollhom esperjenza ħajja ta' fidi.

F'Settembru saret l-Assemblea Djoċesana – li issa saret appuntament annwali għall-Knisja f'Malta – bil-għan li tagħmel valutazzjoni tal-ħidma li saret u tippjana għas-sentejn li ġejjin.

F'Ottubru u Novembru saru l-Assemblej parrokkjali tista' tgħid f'kull parroċċa, u dawn komplew jgħinu biex tinfirex il-parteċipazzjoni u jsir ippjanar aħjar ukoll fuq bażi parrokkjali. Dawn l-Assemblej, b'sehem ta' 'l fuq minn tlett elef ruħ, offrew opportunità għal djalogu, diskussjoni u kritika. Offrew okkażjoni wkoll biex min għandu r-responsabbilta' tat-tmexxija jista' jisma' lill-oħrajn.

Il-ħatra ta' l-Arċisqof il-ġdid Paul Cremona f'Diċembru, proprju fi tmiem il-Pjan Pastorali 2005-2006 u qabel il-bidu tal-Pjan il-ġdid, għandha tkun ta' kuraġġ u enerġija għal dawk kollha li ħadmu tul dawn is-sentejn biex jitwettaq dak li s-Sinodu Djoċesan talab mill-Knisja f'Malta.

Dak li nżera' fis-Sinodu Djoċesan diġa' qed jagħti frott. Bl-għajnuna ta' Alla, għad jagħti ħafna aktar frott.

Kummissjoni Sinodu

30 ta' Diċembru 2006